لميمة
بين لكلوفي ولعضاضة
حالي قصتو قصة
وغريبتو غريبة
من نهار غيبت لكمرة
ولحزن صايل جايل
داير خبلة وعامل حالة
نورك يا لميمة
مازال ساطع
محفور فلكلب مشعشع
منقوش بالسم وبالدم
وداير دارة
خيط الروح الباهي
تقطع فوق لجبين سباعي
تشتت وكلل جوهرو الصافي
فيطر قبل ما يطيب وينادي
وبعدما كان يزين كل لقواس
وكل السواري
شمس الربيع الضاحكة
فالدغيمشية فالعشوية
فالسمايم فالليالي
فكل وقت وحين وفكل الثواني
غرز ضوهاتكسف نورها
غطاتو جلالة حارة وربطات
علام لفرح مبهج وزاهي
تنكسات ورودو
تهرسات ضلوعو
خواو جنابو
ولحياة ماتت وما بعثات
شمعة بيضة معلية
تضوي بالسخاوة مندية
بالضد ولعناية حاضنة
زينها زين لعقل خاثرة
خيمة كبيرة مهورة
وتادها فلأرض ثابتة
كي طلعات وكي هبطات
شوقي ليك بعددلبشر ولحجر
بعددالطير واللي فلبحر...
ما تهبى نارو ما تبرا كرحتو
الا الى تلاقينا عند الحق
او ليام ولات
بقلمي:✏سكينة الشرقاوي
بجعدفي:2/07/2018✏
ليست هناك تعليقات:
إرسال تعليق