كالك.الله يجعل الغفلة
بين البايع والشاري
ونا دخلت لسوق
بغيت نعرف غي شنو طاري
ماني بياع ماني شاري
لقيت الدرويش
يبكي بدمع جاري
سولتو مالك
تنهد وكاليا
فلوسي على قدي
ونا بغيت غي خروف لدراري
كولت ليه دور السوق وشوف
راك تلقى على قدك
تنهد وكاليا
راني دخلت وشفت على قدي
مالقيت .كرهت السوق ولي فيه
ملي دارو بيا شناقة
كل يهذر من جيه
ماعرفت واش نشري خروف
ولانسمح فيه
حرت والسوق دار بيا
وراسي تنفخ
من هاذشي ليواقع فيه
الكسابة والشناقة
كل يلغط من جيه
كالك ليتلف يشد لرض
ونا شديت لرض وبقيت نفكر
شفت السوق شحال منهم
يحلفو على غدر الدرويش
ويمصو دمو وياكلو
لحمو خضر
ونا لحساب ليكونت داير تلف
وزمان عليا مابقى يرخف
والسوق مكاين فيه غير نتف
الكساب يحلف
والشناق يحلف
والدرويش بو دراري يتلف
ولايكول واش نشري
ولانتسنى سوق يترخف
بقى يتسنى حتى سوق خرف
هذا هو حال درويش
على نفسو يكلف
ملي يشوف فولادو
قلبو يتقطع ويمشي يتسلف
وملي يمشي يشري
فلوسو قليلة
ماتشري ليه لامليح ولاكرف
كمدها فقلبو
وشد لرض
وكره الدنيا وعدف
........خالد حدادي..........
ليست هناك تعليقات:
إرسال تعليق