قصيدة ( حال وحوال )
يااااقلبي علاش تبكي ؟؟؟؟
ؤداير هاد الحالة
اللي راح مايرجع
مثلة قالوها لوالة
الحب القاسي علم فيك الضربة توجع
ؤقلبي ملكي ماشريتو بدلالة
حبيبي كان سلاحي
مشا تهرس جناحي.
ونا طبعتي ماشي بدالة
خلاني وحدي ف وجه المدفع
قلت عمرني مننساه نهدر باللي حساه
هذا حال الحب ليه عشاقة ميالة
واللي كبر ف هاد القلب وعلى عرشو تربع
غدر بالوفا قصة ماعندها كمالة
نهدر على حوال الناس كيف توزع
وعلى حوال الدنيا الرحالة
اللي كترو فيها الحصادة ولامن يزرع
ونهدر على نسا دجبالة
اوعدي اخدمو بالليل ونهار كيف الرجالة
تصبغ ف لحيوط وتزيد ترقع
وراجل لقمار هي حياتو
والسبسي صاحبو ف القهاوي يتسكع
وملي للدارو يرجع
انفخ اسوط .اخرج لگرون انطح ف دك لغزالة
كي الثور الهايج ...مايراعي مايحشم
حتى ظهرو اتقسم عاد يبدا يركع
.ونهدر على حال المحطة فيها ناس حمالة
تتقاتل على طرف الخبز
والشقا ترسم عل الوجوه بالطابع لمطبع
ونهدر على دراري صغار تتبهدل
تبيع ف منادل ..مقطعين الصنادل
قالو عليهم عوالة
والعين تدمع والحال ف القلب اقطع
ونهدر على ناس لحدود راها جوالة
تهز لحمل على الظهر كسوة وكسرة ؤقليلو ينفع
تمشي عالجمرة ..تدبح بموس حافي
هادو ناس ماشي حوالة
والزمان المر غادي كيف الغول لمجوع
لامن اشوف الشوفة ولامن ايسمع
ونهدر على الزهر اللي مابغا يزهر
ف جنان لبنات اللي فيهم الزين سلالة
ولعزارة كترو تزوجو غير ف لخيال
قالو الواقع مر ولى يخلع
ونهدر على الصحة ونعمة لعقل
والزهايمر تفشى ..ؤالناس عليه ماسوالة
واللي مقابلو اعاني بالاعصاب والراس مصدع
ونهدر على الصبر اللي تلفنا مفتاحو
والناس ماتقرا كترو فينا الجهالة
ؤباب العلم بقا لليوم مبلع
ونهدر على حال الطرقان ف بلادي قتالة
اللي تعطب واللي ولات هجالة
واللي ايسوك لحديد ماهمو الموت اللي تجمع
ويسيل الدم المغدور ف واد سيالة
الخاطر معصب والقلب مقبوط ؤمروع
ونهدر على حال المرضى ف سبيطارات نعالة
لامن اداوي الجرح المفتوح
.الطبيب تشكي عليه ف كلامو انوع
ادهن السير اسير ؤكاس اتاي مشحر منعنع
ونختمها بحروفي قالو ثائرة زجالة
اللي نكتب فيها نبدع
موهبة من عند الله
الى عطاك العاطي ....مااايقلع
.بقلم .حسناء العجوري
ليست هناك تعليقات:
إرسال تعليق