غرست شجيرة
بعود مفنن
وبفاس زماني
حفرت ليها سكنة....
.....
سقيتها بالفن
وبقيت فيها نتعجب
وبغبار لمعاني
حسبت زينها للدنيا جنة...
....
ردمتها بحروف
ودكيتها بكلام
ومن قراب لمعاني
اعطيت عبارها وزنة...
.....
كربلت جدورها
بالصفا والنية
وزبرت عود الما بسناني
ودوى لمقص بديك الرنة...
....
بانوا وريداتها بالوان
بشوفتهم يعجبو
رشيتها بحلاوة لساني
و لنغمتها لحن عطاها بنة....
.....
بدات تزهر
ورقها اليابس يطيح
فيها حكاية زماني
والميت منها درتو حطب الركنة...
....
العود ولدتو جردة
بخضارو ونوارو
من بعد عمري الفاني
بالخير يجبدوني لا بلسان اللعنة...
....
وسطها نجلس ونفكر
و سبحان الله الخالق
بقدرتو من حماها وحماني
نترجاه يرحم الغراس وبلا منة...
.....
.........أحمد الناصري.....
ليست هناك تعليقات:
إرسال تعليق