علاش يا ناس
نسينا نهضرو
على وقت الدراس
نسينا الخماس والرباع
نسينا شلا ناس....
في وقتها كنت صغيرة
نتبع جدي للبحيرة
نسرق الخضرة
في الظهيرة تحت
الشمس القايلة
مسكين هو ناعس
ما جاب للدنيا اخبار
ؤ في العشية
نمشيوا انا واخواني
نجيبو الزرع بالشواري
منين يدوز الحلواني
نسرقو الصوف من لمخاد
ؤنعطيوه حفنة زرع
شبعنا جبان وصوفا
ايام كانت جميلة...
في وقت الدراس
كنت نسمع الاغاني
على لمرا ؤ ما كنت
نعرف لمعاني
كانو يقولو
لمرا هي لمرا
نواضرها بالغبرة
ؤ ركابها بالدبرا
ؤ تضوي كيف القمرة
هذه هي لمرا....
دابا شكون بحالي
يتفكر هذه الاغاني.... ؟
ايام جميلة كانت....
مليكة بوبراهيمي
ليست هناك تعليقات:
إرسال تعليق