نتوة ..والنتوة شي من السعادة ..
نتوة ..والنتوة .. ولف وعادة..
نتوة والنتوة بسطة ..وزيادة..
ياهدا دون هادي ..
شكون نتا ياهدا؟
نتوة والنتوة.. رجليك فالوقفة
نتوة والنتوة قلبك فالعطفة
النتوة والنتوة هي ديك الخطفة
هي اللهفة لي تجريلها باللهفة
المرا اجمل قدر..
المرا احلى صدفة
نتوة... والنتوة ...فتنة وغلابة..
لدلال والتيهان..
وعيون نصابة..
الهاجرة الوفية ..
الصادقة الكدابة..
البهجة ..ولسرور ..
وهموم كركابة
النتوة والنتوة..
نصفك وشريكتك..
النتوة ..والنتوة..
ستار فضيحتك..
النتوة ..والنتوة
دواك و جريحتك
النتوة والنتوة ...
..فرحة تضمك
..لوكان تهمها كيف تهمك
..ختك هي ..خليلتك هي ..
وهي شريكة همك
هي البنية ... وهي المرضية امك
نتوة والنتوة.. شي راقي وجميل..
نتوة والنتوة .. نسمة بيك تميل..
نتوة والنتوة حضك ..
..زهرك الهبيل
يالواقف على بابها ...
..نتا يابن السبيل
جمال السوسي
ليست هناك تعليقات:
إرسال تعليق