مكاين على من تعول ياقلبي
ولاعليه تتحاز
وخود المعنى من البقرة
واخة حلابة معمرها تدز
راه معرفة رجالة كنز
اما معرفة شمايت
متعلمك غي لعكز
شفت شحال من طير
وعرف بلي عمر الدجاج
مايولي وز
كلامي مع ليفهم المعنى
بلامة يتنغز
ناس الخير وناس العز
لي من لمحبة غير تشوفهم
من لبلاستيك تقفز
علاش كثرو قلوب الشر
حتى الخير من قلوبهم غرز
كالوها ناس زماااااااااان
ديما مول لفز تيقفز
حتى السبع مابقا يخلع
ملي سدو عليه فلقفز
ولا القرد يلعب عليه
يضرب الرش ويركز
علاش ولات دنيا هاكذا
حتى مابين الخوت نايضة دبز
باش تعرف مشات
ييييام النخوة والعز
وحتى الزمان تزيز وزاد تكرز
شحال قدك ماتحسب فلحساب
اتزيد تفرز
وخا تحلم راسك باغي تولي طير
ديما تلقى راسك
غير فبلاستك تقفز
شحال من واحد
غير يضحك فوجهك
ويكوليك عندك الصح
وهيا مكيناش
باش تعرف الطنز
ولينا عايشين فغابة كيف الماعز
عييت مانخيط فالوقت
حتى الخيط تخبل
مالقيت باش نغرز
كولت نجمع لقوافي
ونبدا فلكلام نطرز
بديت نحرك بلمغرف
ولاحرف بغا ليا يتهز
....... بقلم خالد حدادي.......
ليست هناك تعليقات:
إرسال تعليق