بوشعيب :
1_بوشعيب لحياتو عدف١
ما عندو ما يصرف
بالتخمام تلف
سخف٢
ب الهم شرف٣
الزمان به يعصف
وعليه يتعسف
من العرق ما ينشف.
2- بوشيعب صار يعرف
منين يتكال لكتف
اللي بغا يشتف يشتف٤
هو عارف ك يتصرف
مع اللي يهرف٥
وما يگنف٦
ولو ضربو بمغرف
يفضحو
عليه ما يعطف.
3- بوشعيب راجل
ديما واقف على رجل
كل يوم شموع يشعل
على بلادو يناضل
ديما حاضر مايماطل
قال :لا حليب لا گازوال
لا (علي )٧ يا رجال
سول سؤال: كيفاش؟
الناس تموت بالعطش
وناس عاطييها للغش
المرضى خاصهم طبيب
يعالجوهم ف موعد قريب.
4- بوشعيب عندو حس فني
الى شبعات الكرش
تقول للراس غني
ويقول العام زين
إييه بغينا موازين
نكونو حنا هما الفنانين
و مطرب الحي قريب
حسن من واحد غريب
ف ساعة لفلوسنايجمع
و لبلاد ف فقرها تكربع٨
ينشر الفسق
وياخذ الرزق
ياكل الغلة
ويسب الملة
ها القيم الإنسانية
في العيطة الزعرية
أحواش و الگدرة الصحراوية٩
أحيدوس والطقطوقة الجبلية٩
وف أغنيتنا العصرية
اللي دار البركة ف عشاه يتعشى
واللي يحقر بلادو ما يستاهلها
شحال من بوشعيب
ف بلادو ما يقول عيب
ف حبها دايب
الإهمال رجعو خايب
خممو ١٠ ف العقايب
الجوع وقلة مايدار
تولد المصايب
وتخرب الدار.
لا.
راية البلاد لازم تعلا
كرامتك يابوشعيب أغلى
بها الوطن يصير جنة
ويحلا فيه الرقص والغنا.
مقابل كلمات محلية: ١-عدف: يكره .٢- سخف: ضعف.٣_ شرف: صار عجوزا.٤- يشتف : يخبط عشوائيا .٥- يهرف: يأخذ أشياء بدون وجه حق.٦- يگنف: يخجل..٧-( علي): علامة تجارية لماء معبإ .٨- تكربع: تسقط.٩- العيطة الزعرية - أحواش و الگدرة الصحراوية- أحيدوس والطقطوقة الجبلية : أسماء لبعض ألوان الاغنية المغربية.
عمر بنحيدي. 24-6_2018
ليست هناك تعليقات:
إرسال تعليق