بلادي العزيزة 😂😂...؟!
بلادي يا وردة فايحة بعطر منسوم
يا قمر فسما مضوي باهي فوسط النجوم
بلادي خليط متجانس حبق و ياسمين فالمشموم
لكن يا بلادي شفت الفكرون فالخواط عجبوا العوم
هذا الحال يا بلادي ما بغيت فيك يدوم
ياك بوعميرة فوسط النسور فسما ما قادر يحوم
شفت الدرويش حقوا مهضوم
بسباب التهميش أصبح على الواقعوا مفظوم
نتمني سماه تصفي من الغيوم
بلادي الله يهدي فيك هاذ القوم
ما بغيت فيك يا بلادي حالي يكون مشؤوم
اغرسنا النخل لكن أرجع دوم
الوقت حار ناروا تكوي بصهد والحموم
كيفاش دير تعيش وتعايش وتساير لهموم
ذاك وذاك للوطن كانوا خدوم
جناو التمر و عطونا الزقوم
جرعنا الأوجاع وجربوا فينا السموم
ابلادي فيك المظلوم
فزنزانة محكوم
وفيك الظالم يتبهي باللوم
الفاجر أصبح ممدوح ومدعوم
يتلقي شواهد و أوسمة ورسوم
علاش يا بلادي أكتر فيك اللوم
لله جوبني بدليل وعلوم
العدل هاجر مشي لبلاد الروم
بلادي الله يهدي عليك هاذ القوم
بلادي يا زينة نقش وطرز موشوم
حق المسكين فقبر مخفي و مردوم
الفساد أصبح مشهور ومعلوم
كيفاش المعقول أصبح مجلي ومفظوم
عفاك ابلادي جوبني غير ليوم
أنا راه قلبي عليك مغموم
بالجرح والقرح عامر ومألوم
ما بغيت يا بلادي شأنك يكون مهدوم
ما بغيت حال أولادك يكون مضيوم
بغيتك تكون رحبة دالخير ما فيك المظلوم
المسكين مساوي فالاكل وشراب والنوم
ما شي يا بلادي يأخذوا الغلة ويسكتونا بالتوم
أحنا كلنا بشر ما فينا المعصوم
بغيت العدل فبلادي يكون مساوي ومخدوم
نطلب الله يحفظك يا بلادي
بحفظ الحي القيوم
عافكم فتحوا أبواب التنمية وهرسوا زكروم
هذا جيل التكنولوجيا والعلوم
الشمس ما دراق بالغربال والشتا ما تصب بلا غيوم
***بقلم عادل الغيوان ***
ليست هناك تعليقات:
إرسال تعليق