@@أطوار العمر في سطور@@
حيت عزيزة عليا الدارجة
غادي نهدي ليكوم واحد التفريجة
على مراحل العمر دريجة بدريجة
من السبوع للصبا للبلوغ للبوجة (العرس-تطوان)
ونزيدو عليها شي حويجة......
ملي يزوي والعين تحل
كاعول يحريق المراحل
تقولو كوغو مومو
يدلى شلاكمو
متقوليشي هيدا أنا كبرت......
تقولو ألعايل
يقولك أنا الراجل
مسكييييييين مستعجل
دابا تجي الرجلا
وتقول الله يلعنا جرا
قرا أو ماقرا...
إلا مبقاش مليوح بارا
وقلب على شي خديمة ودبرا
الخلصة اللولة تبانلو المرا
بلاتي عليك أوليدي
المرا متهربشي
قولي مالك استعجلتي ؟؟؟؟؟
باقي للوعود ما وفيتي ؟؟؟؟؟؟
ياك نتا لي قولتي:
غدي نشريليك أمويمتي
غدي نديرليك أوخيتي
غير شفتي الفرنكات تبدلتي
كونتي حاضي البارسا و المدريد وباس
ولات عينك حاضيا غير بيوت النعاس
وعلى الوجيبة كيف الديب عساس
حتى تجبر المرا لي هي اللساس
وتشوف شي دار على قد القياس
عاد فياق داك الإحساس
وعلى الفرص بقا عساس
ياك ماحمسوك كثرة الأعراس
اذا بديتي بهد التنقاز
شحال مابقيتي تجيك ف الراس
أسيدي ماكاين باس
قبل ماتوقع في الإفلاس
نخترولك شي بنت الناس
أو كاين شي وحدة تحت الراس؟؟؟
ييه أمويمتي على وحدة انا عساس
وماكايدينيشي عليها النعاس
الله يحفظك أوليدي ويحد الباس
وجد أحلى ماعندك من اللباس
ونديرو كيف كايديرو الناس
غير يخطب يسول على الخروج فقاش ؟
دااااابا أوليدي فوقاش تولي مافياش
ويبردو اليدين والحب الجياش
جيبنا أسيدي العدول وتجمعو الحباب
والرويجل داير حشمان ف الجلاب
وشي داخل وشي خارج من الباب
كلينا وشربنا وتفاهمنا وتكمل الصواب
جابوليه الكتاب وعطاوه القلم بأداب
وقالولو مضي على بداية العداب (القافية فرضاتا )
بالدهشة مضا بلامايقرا ف الكتاب
حاس براسو تزرف وخرج للباب
آش درت أنا ياك ماهزني الماء ؟؟؟
مسكين عاد تفكر نوال وحياة وفاضمة
أوليدي نسا لي فات وبقا ف الكلمة
واذا تململتي عاد عيهزك بصاح الماء
حاول أوليدي تنسى الأيام الماضية
وجماع الفلوس ودير شي عراسية
وجماع الوراق وعدل الحالة المدنية
وملي تكون فرحان أجي طلل عليا
واخا تجي بيدك خاويين بلا شباكية
مشي حتى دابز عاد تجي تشكي عليا
راه مابقالا ماتهز يديا ولا تسمع وذنيا
باراكا اللي دوزت العكوزة و باباك عليا
وحس أوليدي بيا ومتكملشي عليا
قبل مايجي النهار لي تبكي فيه عليا
و ما يبقالك غير ترد التراب عليا
فعيوط يتمتاع ماحدا الدنيا خاوية
بدا كيخمم بيه فيه ف الدرية
كيجبد قلم الرصاص والحالة المدنية
ويبدا يحلم يعمر ف الأسماء الخيالية
مسكين، حريق المراحل ولات فيه بلية
زربان مكملشي العام تزادتلو بنية
مالكوم كاتسناو فيا ؟؟؟
ياك ما باغيين نعاودلكوم على البنية حتى هي؟؟؟
قالولكوم عليا كاتب المسلسلات المكسيكية؟
رجاااااع ألالة وأسيدي للسطيرات اللولية
وطبق دورة الحياة الروتينية على البنية
وغادي يدوز عليها ماداز عليك وعليا
كانت هدي أطوار العمر بطريقة فكاهية
نطلب من الله تقبلو عليا
ويفرجها عليكوم وعليا.......
-يوسف التجاني-
ليست هناك تعليقات:
إرسال تعليق