الجماعة

.....الجماعة....
وسط الجماعة كنت لرجلي نربع
أيام اللمة  عند السبع
و ما منه نخاف أو نتخلع....
.....
أيام العشور من الكاعة يتدفع
وايام لحكام كان باصبع
وأيام واحد يهضر، والجمع يسمع....
.....
كان اوثاق الجماعة يتنصب ويترفع
وكانت حتى كلمتها  قاصحة تلسع
وللصلح بين الناس من خيرها ينبع..
....
النفوس كانت بالقليل تقنع
والحياء لقيمة الرجلة يرفع
مع الصبي تكبر ومنها يرضع...
....
فين مقدم جماعة وليها يجمع؟؟
وفين حكمها للخاطىء بيه يسرع
ويرضى بالخطية وبالجمع عندويقنع..
....
فين لي ما ولى فيه طمع
وخلاو الخاين ما بقى يشفع
والظالم .. لحكم الجماعة ما يركع...
....
ولينا تايهين و للمربط لازم نرجع
ووسط صنادق نتصاطح و نتكربع
لا حلاوة لحياتنا باقة ترجع...
.....
زماننا للجماعة راه ودع
و كل واحد مع حالو  مصدع
لا كلام ولا حديث باقى يتسمع....
....
كنت مع حديثهم نسرح ونرتع
أيام جدي بالرزة وسلهامو ينصع
والسكيطة معلقة والسينية تلمع...
....
واش وقتنا باقة تزيد تفكع
وبغبنها باقة غادة وتزيد وتطلع
وما يبقى لبنادم فيها خير ولا نفع....
....
ولينا على الخاوي نتجمع
ها الداوي خاوي ..ها المضبع
ها أنت تهضر ولا واحد منهم يسمع...
....
شوفوا يا ناس اليوم آش وقع
وخوفي على ولدي فيا يفزع
ما بغيتو من الدنيا يمل ويقنع....
....

........أحمد الناصري......